व्यापक जनसहभागातून सेवा हक्क दिन साजरा

व्यापक जनसहभागातून सेवा हक्क दिन साजरा

by Aajchi Navi Mumbai
May 03, 2025
85

नवी मुंबई ः महाराष्ट्र लोकसेवा हक्क अधिनियम 2015 राज्यभरात लागू होऊन 28 एप्रिल रोजी 10 वर्षे पूर्ण होत असल्याने या दशकपूतचे औचित्य साधून 28 एप्रिल रोजी ‌‘सेवा हक्क दिन‌’ साजरा करण्याचा निर्णय शासनाने घेतला असून त्या अनुषंगाने नवी मुंबई महापालिका आयुक्त डॉ.कैलास शिंदे यांच्या मार्गदर्शनाखाली जनसहभागावर भर देत विविध उपक्रम राबविण्यात आले.

नवी मुंबई महागरपालिका मुख्यालयात शासन निर्देशानुसार सकाळी 11 वा. विशेष कार्यक्रमाचे आयोजन करीत सेवा हक्क दिनानिमित्त सर्व अधिकारी, कर्मचारी यांनी मुख्यालयातील ॲम्फिथिएटरमध्ये एकत्र येत मुख्य लेखा व वित्त अधिकारी सत्यवान उबाळे यांच्यासह सामुहिक शपथ ग्रहण केली. लोकसेवांविषयी व त्या लोकसेवा नागरिकांना पुरविण्यासाठी पालिका राबवित असलेल्या ऑनलाईन प्रणालीसह इतर सुविधांची माहिती नागरिकांपर्यंत व्यापक स्वरूपात पोहचण्यासाठी क्रीडा व सांस्कृतिक कार्य विभागाच्या वतीने विशेष पथनाट्याचे सादरीकरण महापालिका क्षेत्रात विविध ठिकाणी असून त्याचा आरंभ महापालिका मुख्यालयातील कार्यक्रमापासून करण्यात आला. यावेळी उपस्थित महापालिका अधिकारी, कर्मचारी यांच्याप्रमाणेच या कार्यक्रमात सहभागी नागरिकांनीही पथनाट्यातून दिल्या जाणाऱ्या मनोरंजनातून प्रबोधनात्मक संदेशाची प्रशंसा केली. विविध विभागांमध्ये वर्दळीच्या ठिकाणी या पथनाट्यांचे सादरीकरण करून लोकसेवांविषयी व्यापक जनजागृती केली जात आहे.

क्यू आर कोडसह माहितीपूर्ण फलक
लोकसेवा हक्क दिवसाची तसेच त्या माध्यमातून लोकसेवांची माहिती जनतेपर्यंत पोहचण्यासाठी महापालिका मुख्यालयासह विभाग कार्यालये व इतर कार्यालयांमध्ये महाराष्ट्र लोकसेवा हक्क अधिनियम 2015 विषयी माहिती देणारे बॅनर प्रदर्शित करण्यात आले असून त्यावर अधिसूचित सेवा व शुल्काची माहिती सहजपणे उपलब्ध होण्यासाठी क्यू आर कोड प्रसिध्द करण्यात आले आहेत.
नागरिक आपल्या मोबाईलवर हा क्यू आर कोड स्कॅन करून महाराष्ट्र लोकसेवा हक्क अधिनियम 2015 विषयीचा शासन निर्णय व त्याची माहिती उपलब्ध करून घेऊ शकतात तसेच पालिकेच्या वतीने उपलब्ध करून दिल्या जाणाऱ्या 68 लोकसेवांची संपूर्ण माहिती जाणून घेऊ शकतात. त्याचप्रमाणे सदर सेवा उपलब्धतेबाबत कोणत्याही प्रकारची तक्रार करावयाची असल्यास त्यासाठीचा क्यू आर कोडही या बॅनरवर प्रसिध्द करण्यात आलेला आहे.सदर बॅनर डिजीटल स्क्रिनवरही प्रदर्शित करण्यात आले असून याव्दारे जास्तीत जास्त नागरिकांपर्यंत लोकसेवांची माहिती पोहचविली जात आहे.
लोकसेवांविषयी जागरूकता मेळाव्यांचे आयोजन
याशिवाय समाजविकास विभागाच्या वतीने 8 विभाग कार्यालय क्षेत्रात बहुउद्देशीय इमारत बेलापूरगाव, नमुंमपा शाळा क्र. 12 सेक्टर 6 सारसोळे नेरूळ, नमुंमपा शाळा क्र. 28 वाशी, नमुंमपा शाळा क्र. 22 तुर्भे स्टोअर, नमुंमपा शाळा क्र. 35 सेक्टर 7 कोपरखैरणे, नमुंमपा शाळा क्र. 76 घणसोली, सेक्टर 4 समाजमंदिर ऐरोली व नमुंमपा शाळा क्र. 52 दिघा अशा 8 ठिकाणी लोकसेवा हक्क कायद्याविषयी जागरूकता मेळाव्यांचे आयोजन करण्यात आले होते. याठिकाणी महिला बचत गटाच्या सदस्यांनी मोठ्या संख्येने उपस्थित राहून हे मेळावे यशस्वी केले. सेवा हक्क दिवसानिमित्त असे विविध उपक्रम राबवून त्यामध्ये जनसहभागावर विशेष भर देण्यात आला असून नागरिकांपर्यंत लोकसेवांची माहिती पोहचविण्यात आली तसेच याबाबत काही तक्रार असल्यास त्या नोंदविण्यासाठीही उपलब्ध सेवांची माहिती करून देण्यात आली.
सिडकोतही सेवा हक्काची शपथ
सिडकोचे उपाध्यक्ष तथा व्यवस्थापकीय संचालक विजय सिंघल यांनी सेवा हक्क दिनी सिडकोतील अधिकारी आणि कर्मचाऱ्यांना सेवा हक्काबाबतची शपथ दिली. या प्रसंगी श्री. गणेश देशमुख, सहव्यवस्थापकीय संचालक, सिडको यांसह सिडकोतील विभाग प्रमुख, अधिकारी आणि कर्मचारी मोठ्या संख्येने उपस्थित होते. सिडकोच्या अधिकारी आणि कर्मचाऱ्यांनी सेवा हक्क शपथेचे सामूहिक वाचन केले.