आयपीएल दरम्यान पार्किंगचे नियोजन

आयपीएल दरम्यान पार्किंगचे नियोजन

by Aajchi Navi Mumbai
Mar 28, 2022
566

पार्किंगसाठी ‘क्युआर कोड’ तसेच रहदारीच्या ठिकाणी नो पार्किंग झोन

नवी मुंबई : डॉ.डी.वाय.पाटील मैदानात 27 मार्च ते 18 मे 2022 दरम्यान इंडियन प्रमियर लीग अर्थात आयपीएलचे क्रिकेट सामने होत असून यासाठीची तयारी सुरू आहे. मात्र ज्या दिवशी सामना असेल त्या दिवशी शहरातील तसेच मैदान परिसरातील वाहतूक सुरळीत राहण्यासाठी वाहतुक पोलीसांनी विशेष खबरदारी घेऊन वाहनांसाठी पार्किंग सोय करण्यात येणार आहे. रहदारीच्या ठिकाणी नो पार्किंग घोषित करण्यात आले आहे. तसेच पार्किंगच्या ठिकाणी क्यूआर कोडची सुविधा देण्यात आली आहे.

आयपीएलमधील 20 सामने हे डॉ. डी. वाय. पाटील नेरुळ येथील मैदानात होणार आहेत. यातील चार सामने दिवसा तर 16 सामने दिवस-रात्र असणार आहेत. या मैदानात 55 ते 60 हजार इतकी प्रेक्षक क्षमता असून दीड ते पावणेदोन हजार वाहनांचा अंदाज आहे. डॉ. डी. वाय. पाटील मैदान प्रशासनाचे वाहनतळ आहे, मात्र त्याची क्षमता फक्त 500 वाहनांची आहे. हे वाहनतळ फक्त महत्त्वाच्या व्यक्तींसाठी आरक्षित असणार आहे. त्यामुळे इतर प्रेक्षकांसाठी नेरुळ सेक्टर 19 येथील भीमाशंकर मैदान आणि रहेजा मैदानात वाहनतळ करण्यात आले आहे. सामना पाहण्यासाठी पुणे, मुंबई उपनगर तसेच इतर ठिकाणांहून प्रेक्षक येणार आहेत. त्यांना वाहनतळ नेमके कुठे व कोणत्या रस्त्यावर आहे, याबाबत नेमकी माहिती मिळावी व वाहनतळ शोधण्यासाठी होणारी भटकंती व त्यामुळे होणारी वाहतूक कोंडी टळावी यासाठी क्यूआर कोडची सुविधा उपलब्ध करून देण्यात आली आहे. तिकिटावरच क्यूआर कोड देण्यात येणार असून तो जिओ लोकेशनशी जोडलेला असेल. कोड स्कॅन केल्यानंतर तुमच्या वाहनाला पार्किंगसाठी जागा कुठे उपलब्ध करून देण्यात आली आहे, ते लोकेशन समजेल, अशी माहिती वाहतूक विभागाचे उपायुक्त पुरुषोत्तम कराड यांनी दिली. ठाणे-बेलापूर मार्गालगत सेवा रस्त्यावर या मैदानाची दोन प्रवेशद्वारे आहेत. शिवाय पार्किंगसाठीचे प्रवेशद्वारही येथेच आहे. त्यामुळे परिस्थितीनुसार हा रस्ता अन्य वाहनांसाठी बंद ठेवण्यात येईल व ही वाहतूक ठाणे-बेलापूर आणि नेरुळमधील अंतर्गत रस्त्यांवर वळवण्यात येणार आहे.

कडक बंदोबस्त
सामन्यांच्यावेळी चोख पोलीस बंदोबस्त ठेवण्यात येणार आहे. यासाठी पोलीस महासंचालकांकडून अतिरिक्त कुमकही देण्यात येणार आहे. याशिवाय 200 पेक्षा अधिक खाजगी सुरक्षारक्षक असणार आहेत. डॉ. डी. वाय. पाटील मैदान प्रशासनाचे 400 सुरक्षारक्षक असणार आहेत. तीन पोलीस आयुक्त, 12 साहाय्यक पोलीस आयुक्त, 45 पोलीस निरीक्षक, 120 पोलीस उप निरीक्षक, 1200 पोलीस कर्मचारी ज्यात 200 महिला कर्मचारी असा 1300 पेक्षा अधिक जणांचा बंदोबस्त असणार आहे. याशिवाय राखीव पोलीस बळ, जलद गती पथक, दंगलविरोधी पथक तैनात असणार आहे. याशिवाय या मार्गावर अतिरिक्त सीसीटीव्ही लावण्यात येणार आहेत.
नो पार्किंग
डी.वाय.पाटील मैदान परिसरात सामन्यांच्यावेळी वाहतुक कोंडीचा मोठा सामना करावा लागतो. त्यासाठी वाहतुक पोलीसांकडून परिसरात नो पार्किंग झोन करण्यात येणार आहे. शनि मंदिर कमान,डी.वाय.पाटील हॉस्पीटल, शनी मंदिर टी पाईंट, पाणी पुररठा चौक, आर.आर.पाटील उद्यान ह्या मार्गावर सध्या सम विषम पार्किंग सुविधा आहे. मात्र सामन्यांच्यावेळी वाहने पार्किंगमुळे आणीबाणीच्या वेळी रुग्णवाहिका, अग्नीशमन अशा अत्यावश्यक सेवांसाठी अडथळा येत असल्याने सामन्यांच्या दिवशी येथे नो पार्किंग करण्यात येणार आहे.