31 मे पर्यंत विशेष कोव्हीड लसीकरण मोहीम

31 मे पर्यंत विशेष कोव्हीड लसीकरण मोहीम

by Aajchi Navi Mumbai
May 19, 2022
426

नवी मुंबई ः कोव्हीड लसीकरणाबाबत नवी मुंबई महानगरपालिकेने सुरूवातीपासूनच सुयोग्य नियोजन केल्यामुळे 18 वर्षावरील नागरिकांचा पहिला डोस 100 टक्के पूर्ण करणारे नवी मुंबई हे पहिले शहर होते. तसेच दोन्ही डोसचे 100 टक्के प्रमाणही नवी मुंबई महानगरपालिकेनेच प्रथमत: पूर्ण केले आहे. त्याचप्रमाणे 15 ते 17 वर्ष आणि 12 ते 14 वर्ष वयोगटातील मुलांच्या लसीकरणातही नवी मुंबई महानगरपालिका इतर मोठ्या शहरांच्या तुलनेत आघाडीवर आहे. लसीकरणाचे प्रमाण वाढविण्यासाठी पालिका आयुक्तांच्या मार्गदर्शनाखाली 12 मे ते 31 मे या कालावधीत विशेष कोव्हीड 19 लसीकरण मोहीम हाती घेण्यात आली आहे.

सदयास्थितीत कोव्हीडचा प्रभाव कमी झाल्यामुळे दुसरा डोस घेण्याची अथवा तिसरा प्रिकॉशन डोस घेण्याची विहित वेळ होऊनही लसीकरण करून घेण्याकरिता नागरिक फारसे पुढे येताना दिसत नाहीत. मात्र पुरेशा प्रमाणात लसीकरण झाल्यामुळेच तिसर्‍या लाटेचा प्रभाव तितकासा जाणवलेला नाही ही वस्तुस्थिती आहे. त्यामुळे लसीकरणाचे महत्व लक्षात घेऊन तसेच जगातील इतर देशांतील विद्यमान कोव्हीड स्थिती लक्षात घेता चौथ्या लाटेचा संभाव्य धोका नजरेसमोर ठेऊन कोव्हीड लसीकरणाचे दोन्ही डोस आणि निश्चित केलेल्या वयोगटांनी प्रिकॉशन डोस घेणे गरजेचे आहे. याकरिता नवी मुंबई महानगरपालिका विविध माध्यमातून प्रयत्न करत असून लसीकरणाचे प्रमाण वाढविण्यासाठी महापालिका आयूक्त अभिजीत बांगर यांच्या मार्गदर्शनाखाली 12 मे ते 31 मे या कालावधीत ‘विशेष कोव्हीड 19 लसीकरण मोहीम’ हाती घेण्यात आली आहे. या मोहिमे अंतर्गत नागरी प्राथमिक आरोग्य केंद्राच्या क्षेत्रात दररोज किमान दोन ठिकाणी लसीकरण करण्याचे नियोजन करण्यात आले आहे. याकरिता 750 ठिकाणी निश्चित करण्यात आली असून यामध्ये नाके, मार्केट, बाजार, रेल्वे स्टेशन, बस डेपो, मॉल, रहिवाशी संघ अशा नागरिक मोठ्या संख्येने एकत्र येतात अशा वर्दळीच्या ठिकाणी लसीकरण सुविधा उपलब्ध करून देण्याचे नियोजन करण्यात आले आहे. याकरिता महानगरपालिकेच्या परिवहन उपक्रमाच्या एनएनएमटी बसेस उपलब्ध करून देण्यात आलेल्या आहेत.

या मोहीमेमध्ये नवी मुंबई महानगरपालिका शाळेतील शिक्षकांचा महत्वाचा सहभाग असणार असून प्रत्येक नागरी प्राथमिक आरोग्य केंद्रामध्ये 7 शिक्षक व 3 मदतनीस असे समूह तयार करण्यात आले आहेत. या समुहांमार्फत नागरी आरोग्य केंद्राच्या परिसरातील नागरिकांपर्यंत पोहचून लसीकरणाचा दुसरा डोस अथवा प्रिकॉशन डोस न घेतलेल्या तसेच 12 वर्षावरील लसीकरण न झालेल्या मुलांचे लसीकरण करून घेण्याकरिता जनजागृती, प्रबोधन व पुढाकार घेतला जाणार आहे.

18 वर्षावरील 12,54,436 नागरिकांचा पहिला डोस पुर्ण
11,31,341 नागरिकांचे दोन्ही डोस पुर्ण
57,332 नागरिकांनी घेतला प्रिकॉशन डोस
15 ते18 वर्ष वयोगटातील 80,581 कुमार व युवकांनी पहिला डोस पुर्ण
63,751 जणांचा दुसराही डोस पुर्ण
12 ते14 वर्ष वयोगटातील मुलांना कोबिव्हॅक्स लस दिली जात असून 38,731 मुलांनी पहिला डोस
26,751 मुलांचे दोन्ही डोस पुर्ण