भविष्यात पनवेल मधील कलाकार अभिनय क्षेत्रात चमकतील

भविष्यात पनवेल मधील कलाकार अभिनय क्षेत्रात चमकतील

by Aajchi Navi Mumbai
May 22, 2026
20

रामशेठ ठाकूर यांचे प्रतिपादन; अभिनय प्रशिक्षण शिबिराचा समारोप

पनवेल ः पनवेलचे नाव कला क्रिडा क्षेत्रात गाजत आहे. सांस्कृतिक क्षेत्रातही पनवेलचे नाव गाजविण्यासाठी अशा शिबीराच्या माध्यमातून पनवेल महापालिका व अखिल भारतीय मराठी नाट्य परिषद प्रयत्न करते आहे. या प्रशिक्षणार्थीचा अभिनय पाहिल्यावर भविष्यात हे मोठे कलाकार होऊन अभिनय क्षेत्रात चमकतील, याची चुणूक त्यांच्या सादरीकरणातून दिसल्याचे प्रतिपादन माजी खासदार रामशेठ ठाकूर यांनी केले.

पनवेल महानगरपालिका व अखिल भारतीय मराठी नाट्य परिषद, शाखा पनवेल यांच्या संयुक्त विद्यमाने पनवेल, खारघर, कळंबोली येथे 11 मे ते 19 मे अभिनय प्रशिक्षण शिबिराचे आयोजन करण्यात आले होते. या शिबिराचा दिनांक 19 मे रोजी आद्य क्रांतीवीर वासुदेव बळवंत फडके नाट्यगृहामध्ये समारोप करण्यात आला यावेळी मार्गदर्शन करताना ते बोलत होते. यावेळी महापौर नितीन पाटील, उपमहापौर प्रमिला पाटील, सभागृह नेते प्रकाश बिनेदार,स्थायी समिती सभापती बबन मुकादम, अखिल भारतीय मराठी नाट्य परिषद शाखा पनवेलचे उपाध्यक्ष तथा नगरसेवक परेश ठाकूर, बाल रंगभूमी परिषदेच्या राज्य अध्यक्ष नीलम शिर्के-सामंत, अखिल भारतीय मराठी नाट्य परिषद, जेष्ठ पत्रकार मधुकर भावे, नियामक मंडळ सदस्य प्राध्यापक डॉ. संजय पाटील -देवळाणकर, भाजप उत्तर रायगड जिल्ह्याचे अध्यक्ष अविनाश कोळी, महापालिका सदस्य सुमित झुंजारराव, डॉ. अस्मिता घरत उपस्थित होते.

यावेळी मार्गदर्शन करताना नगरसेवक परेश ठाकूर म्हणाले, आजचं युग हे स्पर्धेचे युग आहे. आजच्या काळात संधी कमी आणि स्पर्धक जास्त असतात अशावेळी स्वत:ला चांगल्या प्रकारे अभिव्यक्त करणाऱ्याला ती संधी मिळते. अशा प्रकारचे शिक्षण या अभिनय शिबिराच्या माध्यमातून दिले जाते.व्यक्तीमत्व घडवण्यािसाठी ही अभिनय प्रशिक्षणे निश्चित उपयोगी पडणार आहेत. त्यासाठी महापालिकेने अशी शिबिरे नेहमी भरवावी असे त्यांनी सांगितले. बाल रंगभूमी परिषदेच्या राज्य अध्यक्ष नीलम शिर्के-सामंत म्हणाल्या, प्रत्येकजण आपल्या आपल्या क्षेत्रात अभिनयच करत असतो. प्रत्येकामध्ये कलावंत असतो, प्रत्येकाने तो जिवंत ठेवायचा असतो. अभिनयाला वय नसते त्यामुळे प्रत्येकाने ही कला जोपासायला हवी,पनवेलला लवकरच बालरंगभूमीची शाखा सुरू करण्याबाबतचे आश्वासन यावेळी त्यांनी दिले. यावेळी महापौरांनी आभार मानताना सांगितले की कोणत्याही शहराची ओळख ही तिथल्या इंन्फ्रास्ट्रक्चरमुळे होत नाही तर त्या शहराची सांस्कृतिक चळवळ कशी आहे, सांस्कृतिक वारसा जपला जातो आहे की नाही यावर ठरत असते. पालिकेच्या या नाट्यगृहामध्ये होणाऱ्या या अभिनय शिबिरांच्या माध्यमातून हा वारसा जोपासला जात असल्याचे त्यांनी सांगितले.

यावेळी पनवेल, खारघर, कळंबोली येथील अभिनय प्रशिक्षण शिबिराच्या प्रशिक्षणार्थींचे सादरीकरण मान्यवरांच्या उपस्थितीत करण्यात आले. या सादरीकरणाला मान्यवरांनी आपल्या मार्गदर्शनपर भाषणात शाबासकी दिली. तसेच मान्यवरांच्या हस्ते प्रशिक्षणार्थींना प्रशस्तीपत्रकाचे वाटप करण्यात आले. याबरोबरच या नाट्यशिबिरासाठी मार्गदर्शन केलेले प्रशिक्षक अशोक केंद्रे, संकेत खेडकर, विद्यानाथ सुर्वे, मनोज चिताडे, विक्रांत धीवरे, अमित गाडे, हरीश जाधव ांचाही मान्यवरांच्या हस्ते सत्कार करण्यात आला. या कार्यक्रमाचे सूत्रसंचालन व प्रास्ताविक मुख्य जनसंपर्क अधिकारी डॉ. राजू पाटोदकर यांनी केले. यावेळी अखिल भारतीय मराठी नाट्य परिषदेचे कार्यवाह शामनाथ पुंडे, अभिषेक पटवर्धन,गणेश जगताप, स्मिता गांधी,कविता ठाकूर, उपस्थित होते. प्रशिणार्थींना मार्गदर्शनासाठी नाट्य निर्मिती संदर्भातील विविध पुस्तकांचे वाटप करण्यात आले. यावेळी तिन्ही ठिकाणांचे प्रशिक्षणार्थी तसेच त्यांचे पालक, नागरिक मोठ्या संख्येने उपस्थित होते.